ODIHR-i nis misionin e vëzhgimit të zgjedhjeve në Shqipëri

Tiranë, 2 prill 2025 – Zyra e OSBE-së për Institucione Demokratike dhe të Drejtat e Njeriut (ODIHR) nis sot misionin e vëzhgimit të zgjedhjeve për zgjedhjet parlamentare të 11 majit në Shqipëri, në përgjigje të ftesës zyrtare nga autoritetet vendase.

Misioni drejtohet nga Ambasadori Lamberto Zannier dhe përbëhet nga ekipi bërthamë prej 12 ekspertësh ndërkombëtarë të vendosur në Tiranë dhe 26 vëzhgues afatgjatë, të cilët do të shpërndahen në të gjithë vendin që prej datës 10 prill. ODIHR-i do të kërkojë gjithashtu edhe mbërritjen e 300 vëzhguesve afatshkurtër disa ditë para ditës së zgjedhjeve. 

Misioni do të vlerësojë nëse këto zgjedhje do të jenë në përputhje me angazhimet e OSBE-së dhe detyrime dhe standarde të tjera ndërkombëtare për zgjedhje demokratike, si dhe me legjislacionin vendas.

Vëzhguesit do të monitorojnë nga afër të gjitha aspektet e zgjedhjeve, duke përfshirë edhe zhvillimet para dhe pas ditës së zgjedhjeve. Disa fusha specifike në fokus do të jenë zbatimi i kuadrit ligjor, fushata, duke përfshirë edhe fushatën në rrjetet sociale, puna e administratës zgjedhore në të gjitha nivelet, zgjidhja e mosmarrëveshjeve zgjedhore dhe mbulimi mediatik. Vëzhguesit do të vlerësojnë gjithashtu edhe zbatimin e rekomandimeve të mëparshme të ODIHR-it për zgjedhjet.

Takimet me përfaqësues të autoriteteve shtetërore, partive politike, shoqërisë civile, medias dhe komunitetit ndërkombëtar përbëjnë pjesë të pandashme të vëzhgimit të zgjedhjeve.

Në ditën e zgjedhjeve, misioni i ODIHR-it do të bashkojë forcat me delegacionet nga Asambleja Parlamentare e OSBE-së, Asambleja Parlamentare e Këshillit të Evropës dhe Parlamenti Evropian në vëzhgimin e qendrave të votimit, procesit të votimit, numërimit të votave dhe nxjerrjes së rezultateve.

Rreth dy javë para zgjedhjeve do të publikohet një raport i ndërmjetëm dhe ditën pas zgjedhjeve, në një konferencë për shtyp, misioni do të paraqesë gjetjet dhe përfundimet paraprake. Raporti përfundimtar i vlerësimit në tërësi të procesit zgjedhor dhe rekomandimet përkatëse do të publikohen disa muaj pas zgjedhjeve.

Kontaktet për median:

Katya Andrusz, Zëdhënëse e ODIHR-it: Katya.Andrusz@odihr.pl ose +48 609 522 266

Elma Šehalić, Analiste e Medias: Elma.Sehalic@odihr.al ose +355 68 209 3931